И штипските активисти повикувани на информативни разговори

Продолжува полицискиот прогон врз граѓанските активисти. Во текот на вчерашниот ден, тројца учесници на Шарената револуција од Штип, добија покани за информативни разговори.

Штип, 18-ти април

ЦИВИЛ Медиа разговараше со Горан Трајков, кому со полициско комби, вчера попладне му беше доставена поканата.

“Ги прашав зошто доаѓаат тројца полицајци, со полициско комби и дали не можеа поканата да ја достават по пошта или со курир. Нивниот одговор беше дека немале други возила?! Како што ме соопштија, информативниот разговор е поради прекршување на членот 27 од Законот за прекршоците против јавниот ред и мир”, вели Трајков.

Тој не ја примил поканата. “Не планирам да примам покана од некого кој ги остава криминалците на слобода, а нас за прекршок ни доаѓаат со полициски комбиња!”

Според информациите од останатите двајца активисти кои ги добиле поканите, информативните разговори се закажани за денеска во 17.00, 19.00 и 21.00 часот.

Членот 27 од Законот за прекршоци против јавен ред и мир, се однесува на “оневозможување на користење или оштетување на јавни згради, јавни чешми, извори, плажи, паркови, шеталишта... и други јавни објекти и инсталации…”. Глобата за прекршување на овој член е од 100 до 400 евра.

ЦМ