ЦИВИЛ - Центар за слобода под мотото „За слобода! - граѓанското новинарство за слободата на изразувањето“, на 15-ти септември, четврток, со почеток во 19:00 часот, ќе го презентира проектот за граѓанско новинарство „Граѓански објектив“, на платото пред Универзитетот на ЈИЕ, во скопската Стара Чаршија.
Тимот на ЦИВИЛ ќе ги проектира досега наградените трудови на граѓанските новинари во рамките на натпреварот „Биди граѓански новинар“, а членовите на тимот ќе бидат достапни да одговорат на прашањата на заинтересираните граѓанки и граѓани.
Граѓански објектив е проект во кој се комбинираат истражувањето, медиумските активности и активизмот, кои се основа за долгорочно изборно набљудување. Проектот треба да придонесе кон развој на граѓанското новинарство во земјата.
Намената на проектот е да се идентификуваат и обелоденат случаите на кршење на гласачкото право во интерактивна и динамична активност која ќе ги вклучи активистите за човекови права, медиумите и општата публика, со прибирање фотографски, видео, аудио и пишан материјал, кој ќе послужи како основа за понатамошно набљудување, анализа и известување за изборниот процес.
Проектот е поддржан од фондацијата National Endowment for Democracy.
Оваа вест е достапна и на: Albanian